Stevna Tjóðveldisfloksins
Samtykt á stovningarfundi floksins 22. og 23. mai 1948
1. Føroyska tjóðveldið verður stovnsett við fólkaræði í politiska, vinnuliga, sosiala og mentanarliga lívi landsins.
Einki útlendskt vald eigur nakran rætt til ræði og ognir í landinum. Føroyar verða loystar úr øllum útlendskum bondum, soleiðis sum føroyska tjóðin avgjørdi á fólkaatkvøðuni 14. september 1946.
Heldur ikki eigur nakar einstaklingur ella nøkur serstøk statt frammíhjárætt til vald landsins og ognir. Føroyingar allir eiga somu samfelagsrættindi og hava somu samfelagsskyldir.
2. Politiska lív landsins verður grundað á sonnum fólkaræði. Valdið er fólksins, og teir sum røkja størv í umboði fólksins, skulu í øllum lutum standa fólkinum til svars fyri gerðir sínar í hesum størvum. Tað verður at menna fólkið og vekja ans tess og áhuga fyri landsviðurskiftum og landsmálum.
3. Til tess at tryggja og økja inntøkur fólksins sum heild, verður at leggja ætlan fyri uppbygging framleiðsluútbúnaðarins og uppdyrking landsins, at samskipa vinnulívsstarv einstaklinga og hins almenna, at bøta um og fremja yrkiskunnleika og vinnulívssermentan, at nýta bestu og fullkomnastu amboð og framleiðsluhættir og framleiðsluhættir, at troyta vinnulívsmøguleikar, sum enn liggja á láni í fiskiskapi, landbúnaði, ídnaði, fossamegi og sigling.
Uttanlandshandilin allur, inn- og útflutningur, eins og peninga-, banka- og gjaldoyrismál, verða heilt at koma undir eftirlit og umsjón samfelagsins.
4. Fólkið, sum starvar í framleiðsluni, jarðamenn, fiskimenn og verkamenn, eins og tænastufólk, eiga rættvísa løn fyri starv sítt.
5. Í skattamálum - beinleiðis og óbeinleiðis - verður hitt almenna at leggja rættvísan skatt á samfelagslimirnar. Tað almenna stendur til svars fyri at skattauppgávan verður bein.
6. Øllum teimum, sum av sjúku, elli, óhappi ella vinnuloysi, eru ikki før fyri at bjarga sær og sínum, verður veitt fullkomin hjálp og stuðul. Eingin eigur at koma í neyð ella undir vánalig kor av hesum orsøkum.
7. Grundarlagið undir mentan fólksins er bøttur barnaskúli. Øll børn hava rætt og skyldu til ókeypis framhaldslærdóm, annað hvørt almennan lærdóm ella serstakan yrkislærdóm. Hægri skúlar, studentaskúli og lærdur háskúli, søvn og aðrar mentstovnanir, kostaðar av samfelagnum, bera hægri mentan landsins og vísindi. Fátækt og fjarbýli eigur ikki at forða evnaligum ungfólki lærdóm og mentan. Menta-, vísinda- og listamonnum tjóðarinnar verða trygd sømilig kor og líkindi at røkja starv síni.
8. Sum tjóð í frælsum landi taka føroyingar lut í altjóðasamstarvi um slík mál, sum týdning hava fyri tjóðina.
9. Tað verður at fara undir dyggiligt endurreisingar- og uppbyggingarstarv á øllum økjum samfelagsins, so at fólkið alt, sum her veksur upp, fær líkindi at liva við sømd í føðilandi sínum.
