Nú er hon so her. Fyrsta fløgan við Maluni Thomsen, ið rætt og slætt hevur fingið heitið ”Malan Thomsen”. Ein poppfløga við føroyskum tekstum.

Hóast hetta er hennara fyrsta útgáva, so er rødd hennara at kalla føroysk fólkaogn. Tað er kanska serliga innan barnaútgávur, at røddin hjá Maluni hevur ljóðað seinastu árini.  Eitt nú á vældámdum løgum so sum ”Regnar”, ”Klútadukkan”, ”Eg vil telja stjørnurnar” og ”Mumi”.

 Malan var bert 16 ára gomul, tá hon trein á almenna føroyska tónleikapallin við bólkinum Teinar. Men hví skuldu ganga 18 ár frá fyrstu almennu spælingum til fyrstu solo-fløguna.

Eg veit ikki rættiliga. Eg havi altíð ætlað mær í holt við eina slíka útgávu. Tó havi eg ikki følt, at eg havi verið til reiðar fyrr enn nú, sigur Malan, sum í fjør summar rættiliga legði sítt lív um. Hon segði upp sum pedagokur og fór á sangskeið – alt ein liður í fyrireikingini til at geva út sína fyrstu fløgu. Haraftrat byrjaði hon at undirvísa í sangi á kvøldskúlanum.

Syngur á føroyskum

- Í roynd og veru havi eg brúkt meira enn eitt ár upp á at fyrireika meg at syngja inn hesa fløguna. Malan tók hetta stig, tí hon sigur, at hóast hon hevur verið at hoyrt á ymsum útgávum, so hevur hon ikki verið so nógv við í tí virkna føroyska tónleikalívinum. Hon hevur at kalla bert sungið inn í studio, tá boð hava verið eftir henni.

Sostatt leitaði Malan sær til Danmarkar at fáa sangundirvísing frá danska konservatoriulæraranum Anders Ørsager, sum síðani eisini hevur sungið kór við á fløguni.

Tað er maðurin hjá Maluni   - Finnur Hansen - ið hevur staðið fyri framleiðsluni á fyrstu fløguni. Hon og Finnur vóru frá byrjan av samd um, at talan skuldi vera um eina føroyska fløgu.

- Ja, okkara ætlan var at leggja okkum eftir at gera eina lætta popp útgávu. Tú kanst siga popp fyri vaksin fólk. Og so skuldu tekstirnir eisini vera á føroyskum. Eg haldi, tað hevur ógvuliga stóran týdning.  Verður sungið øðrum máli, so trúgvi eg, tað er torført at røkka hjørtuni hjá teimum sum lurta og eisini hjá tí, ið syngur, sigur Malan, ið tó leggur dent á, at henn dámar serstakliga væl at syngja á enskum.