Heim

Tíðindi

Leikarnir

Støðan

Uefa Cup

Landsliðið

Myndir

Slóðir

17.12.07

Heimsins besti leikari eitur Marta, og er úr Brazil. Hon spælir til dagligt við Umeå í Svøríki, sum KÍ-kvinnurnar leiktu í móti í 2002, men tá spældi Marta ikki við. Marta vann frammanfyri Birgit Prinz úr Týsklandi og Christiane úr Brazil. Tað eru venjarar og liðskiparar úr teimum ymsu limalondunum sum velja ársins leikara.

26.11.07

Savnsmynd

Nú verður fari spakuliga í gongd aftur við at venja. Tað er eingin loyna, at KÍ-kvinnurnar ynskja betur úrslit úti í Europa, og tískil krevur tað, at leikarnir mugu venja meira, og tískil verður fari í gongd venja eitt sindur áðrenn jól.
Eftir at nýggja badmintonhøllin er tikin í nýtslu, fingu KÍ-kvinnurnar tíman sum Team Klaksvík hevði í KÍ-høllini. So byrja verður at venja mikukvøldið kl. 21, so heitt verður á allar at møta 20:50.

25.11.07
Myndasavnið er dagført. Myndir frá fleiri dystum eru lagir út, so tað er bara fara at stytta sær stundir við at hyggja eftir nøkrum góðum myndum.

16.11.07

Ársins leikari 2007

Ársins leikari 2007 hjá kvinnum er okkara Rannvá Andreasen. Hon vann frammanfyri okkara Malenu og Heid Sevdal frá B36

Ársins málverji 2007

Ársins málverji 2007 hjá kvinnum gjørdist okkara Randi S. Wardum. Hon vann frammanfyri Mildrid Djurhuus frá EB/Str.

Ársins stjørnuskot gjørdist Rósa Magnussen úr GÍ. Hon vann frammanfyri Heidi Sevdal úr B36 og okkara Doris í Garði
Ársins venjari gjørdist B36 venjarin Allan Dybczak. Aftanfyri hann komu okkara gullvenjari Aleksandar Djordjevic og Magni Jarnskor úr GÍ.


Toppskjútti 2007

Okkara Malena gjørdist toppskjútti við 17 málum, og aftaná hana kom Rannvá við 15 málum.

06.10.07

Randi er farin til Íslands at royndarvenja við Valur Reykjavík. Valur hevur sæð Randi í Uefa-cup kappingini í summar, sum KÍ var vertur fyri, og ynsktu at fáa hana til Íslands, so tey kundu síggja hana til venjing.
Valur setti seg í samband við KÍ í vikuni, og so hevur alt gingið sera skjótt fyri seg, og eftir ætlan skuldi Randi avstað fríggjadagin, men tá vóru eingi floglíkindi, og tískil fór hon ikki avstað fyrr enn leygardagin.
Valur hava júst vunnið íslensku kappinga aftur í ár, og í komandi viku skulu tær leika aðru rundu í Uefa-cup kappingini, har tær koma at møta Frankfurt úr Týsklandi, Everton úr Onglandi og Rapide Wezemaal úr Belgia.
Randi verður aftur í Føroyum mánadagin. KÍ-kvinnurnar ynskja Randi góða eyðnu og alt tað besta.
06.10.07


Venjarin hjá 1. deild kvinnum hjá KÍ komandi tvey árini eitur Aleksandar Djordjevic. Aleksandar tók yvir eftir, at Jón Harald valdi at fara aðrar leiðir, og tað kann ikki sigast annað enn, at hetta hevur hann klára heilt væl.
Fyrr í ár vunnu kvinnurnar steypakappingina og stutt síðani vunnu tær landskappingina eisini. Harafturat fingu tær gott úrslit í Uefa-cup.
Eftir at Aleksander hevði skriva undir, segði hann, at hann ætlaði, at halda fram í sama leisti, sum hann hevði gjørt í ár, við at geva ungum leikarum kjansin, og samstundis at fáa KÍ-kvinnurnar til, at leika enn betur og undirhaldandi fótbólt.
Kári Purkhús, stjóri í KÍ-fótbóltur segði, at teir vóru glaðir fyri at Aleksandar vildi halda fram sum venjari, og hann helt, at teir høvdu funnið venjarin, sum kundi standa fyri einum ættarliðskifti á kvinnuliðnum.

30.07.07

KÍ-kvinnurnar hava fingið ein nýggjan leikara í hópin. Talan er um 17 ára gomul argjagentuna Olgu Kristinu Hansen. Hon hevur leikt síni barnaár við AB, men hevur seinasta ári verið á Ítróttarskúla í Oure í Danmark. Vit í KÍ eru sera fegin um, at hon hevur valt at leika við KÍ, og kemur hon at styrkja munandi um liðið til Uefa-cup, og eisini til ta heimligu kappingina.

23.05.07


Sunnudagin 13. mai skrivaðu Klaksvíkar Timburhandil og KÍ undir eina 2 ára sponsoravtalu. Sum eina viðmerking til avtaluna, segði Signar Jacobsen frá Timburhandlinum, at tað var ein æra fyri teir, at vera við til at stuðla KÍ-kvinnunum, tí tær høvdu jú verið einaráðandi í føroyskum kvinnufótbólti og stoltleikin hjá Klaksvíkini í nógv ár.
Kári Purkhús, stjóri í Sp/f KÍ, segði í síni viðmerking, at KÍ vildi vera eitt gott umboð fyri Timburhandilin, og teir vóru sera glaðir fyri Timburhandilin vil vera við til at stuðla kvinnunum.


Kári Purkhús frá Sp/f KÍ og Signar Jacobsen frá Timburhandlinum skriva undir

Norðoya Sparikassi er framvegis høvðusstuðul

20.04.07
KÍ-kvinnurnar hava síðan 1998 fingið venjingarklæðir til hvørja venjing, so tær hava bert fyri neyðuni at hava gaggurnar við venjing. Hetta er nakað sum Jón Harald legði stóran dent á, at kvinnurnar skuldu hava somu karmar sum mennirnir á tí økinum, og ofta var hildi at kvinnurnar høvdu betur karmar enn mennirnir á tí økinum.


Bjørg, Liljan, Eina og Malan

Í kvøldi fingu KÍ-kvinnurnar so nýggj klæðir at venja í. Tey gomlu vóru uppslitin, og tí kom tað væl við, at klæðini blivu útskift nú.


Bára, Malena, Elsa Maria, Paula, Mariann

Talan er um nýggjar hosir, shorts, t-shirt, knikers, troyggju og regnjakka. Harumframt fáa tær eisini útvega handklæði til hvørja venjing, so ikki kann sigast annað enn, at KÍ-kvinnurnar eru forkelaðar, men tað hava tær eisini uppiborið.

Fleiri myndir kunnu síggjast her

28.03.07

Klaksvíkar Autolakering hevur stuðla KÍ-kvinnunum við einum bili. Hendan bilin kemur Randi at brúka fyri tað mesta, so hon lættliga kann ferðast í millum Havn og Klaksvík til venjing og dyst.
Tað vóru teir báðir eigarnir av Klaksvíkar Autolakering sum í dag handaðu Randi lyklarnar til bilin.

24.03.07
Veðrið var ikki av tí besta til fótbólt, men álíkavæl sóu teir fáu áskoðarnir, sum høvdu leita sær niðan á vøllin, tvey lið sum kempaðu fyri sakini.
Tá talan er um venjingardyst, so er møguleiki hjá venjarnum at royna ymiskt, og tað var júst tað sum teir gjørdu. Í fyrra hálvleiki leiktu Randi - Malan, Ragna, Paula, Vivian - Mariann, Malena, Tove, Liljan - Rannvá, Sigrid. Vivian fóru út miðskeiðis í fyrra hálvleiki fyri Bjørg Klakstein og í hálvleikinum koma Olga innfyri Randi, Sølvá Andreasen innfyri Sigrid og Gerda Heinesen innfyri Mariann. Sostatt vóru bara Ragna, Paula, Rannvá og Malena sum teljast millum tær "eldru" inni í seinna hálvleiki.
Tað var B36, sum fekk fyrsta málið, og tær høvdu eisini bóltin meira, men tá KÍ fór í álop, so var tað sum oftast farligt. KÍ-kvinnurnar svaraðu skjótt aftur, og Rannvá kundi javna fyri KÍ. 1-1 var eisini hálvleikstøðan.
Í seinna hálvleiki var tað framvegis B36 sum hevði bóltin meira, men tær komu ikki til teir stóru kjansirnar, og vóru ikki heldur ikki serliga farligar. Unga KÍ-liðið kempaði fyri sakini, og til endan gav hetta úrslit, Tove vinnur ein bólt á miðjuni, og sendir hann tvørtur um vøllin til eina fría Rannvá, sum kundi fara einsamøll ímóti málinum, og skoraði eisini trygt.
Landskappingin byrjar um eina viku, og hóast tað manglar eitt sindur í at fáa spæli at hanga saman, so er positivt at síggja hvussu væl teir ungu leikarnir klára seg.
Fyrsti dystur í landskappingini verður í móti GÍ í Klaksvík komandi sunnudag.

17.03.07
B36 skipaði í ár fyri einari kapping, sum líkist Klaksvíkskappingini, fyri bestu kvinnuliðini. Fyrst skuldi finnast útav hvør leikti í móti hvørjum. Lutakasti háttaði seg soleiðis at KÍ møtti B36 og GÍ møtti EB/Streymi.
KÍ-kvinnurnar komu eitt sindur seint í gongd við at venja í ár, tí tað tók langa tíð til at finna ein venjara. Tískil er venjingarstøðan ikki heilt tann besta. Eisini skuldi eitt nýtt spælisystem roynast, og fleiri av teim ungu leikarnum skuldu vísa hvør dugur er í teimum, so dystirnir vóru nýttir til at prøva tingini av, og ikki var hugsa so nógv um úrslitið.
Fyrsti dysturin var í móti B36, sum í ár hava úttala seg um, at tær aftur ætla sær at vera ein kandidatur til FM. Hendan dystin vunnu KÍ-kvinnurnar 3-2 eftir at verið á odda 3-0 í hálvleikinum. Málini gjørdu Rannvá, Doris, Sigrid. KÍ-kvinnurnar spældu væl henda fyrra hálvleikin, til tað at tað er stutt síðani at leikarnir byrjaðu at venja við bólti.

Seinnipartin leiktu KÍ-kvinnurnar so finalu í móti GÍ, sum vann teirra dyst 4-3 á EB/Str. Veðrið til fótbólt var ikki gott, men tað gekk nøkulunda álíkavæl. Aftur hendan dystin sluppu teir ungu leikarnir at royna seg, og tað komu tær bara heilt væl frá. KÍ-kvinnurnar vunnu dystin 4-2 eftir hálvleikstøðuna 2-1. Málini gjørdu Rannvá 2, Malena, Sigrid.
Sostatt kundi Malena taka í móti fyrsta steypinum í ár, og vónandi ikki tí seinasta, og KÍ-kvinnurnar kunnu nú eisini kalla seg havnameistara. Besti leikari í kappingini gjørdist Rudi Zachariassen úr EB/Str.
Hugskotið við hesi kappingini er sera gott og tiltak var fínt, men eitt er at fýlast inná, og tað er at eingir linjuverjar vóru til dystirnar, og tað er sera óhepið tá talan er um lið sum spæla í bestu kvinnudeildini, so her kann B36 gera tað betur til komandi ár.

Leikarnir sum vóru við í dag vóru: Randi S. Wardum, Olga F. Olsen, Ragna Patawary, Jensa Sirdal, Paula Mikkelsen, Doris Joensen, Bjørg Klakstein, Malan Heinesen, Liljan Jacobsen, Elsa Maria Simonsen, Vivian Bjartalíð, Mariann Joensen, Tove Sólheyg, Rannvá Andreasen, Malena Josephsen, Sigrid Jacobsen
Venjari: Alexander Djordjevic

16.03.07
Landskappingin er løgd, og skulu spæla KÍ-kvinnurnar fyrsta dystin í móti, silvurvinnarnum frá í fjør, GÍ í Klaksvík tann 1. apríl. Kappingin endar tann 22. sept og er tað móti GÍ í Gøtu.
Øll leikskráin kann síggjast her

10.03.07

Nýggi KÍ-leikarin (Mynd: www.fsf.fo)

KÍ-kvinnurnar hava fingið ein nýggjan leikara í hópin. Talan er um 20 ára gomlu eiðiskvinnuna Doris í Garði Joensen. Hon hevur leik fyri tað mesta í verjuni hjá EB/Streymi, men seinasta kappingarár leikti hon í verjuni hjá GÍ. Eisini var hon partur av landsliðshópinum, sum var í Makedonia í fjør.
Meira verður at frætta um hópin seinni.

23.02.07
KÍ-kvinnurnar møta FSV04 ella ÍF í fjórðingsfinaluni í steypakappingini. Hetta gjørdist greitt eftir, at lutakast var á árliga fundinum um kvinnufótbólt.
Eisini kom fram at 12 lið hava melda til landskappingina, og er hetta 4 lið fleiri enn í fjør. Sostatt verður kappingin í ár skipa sum 2 deildir, har 6 tey fremstu liðini frá í fjør leika í 1. deild og resti leikar í 2. deild.
Kappingin byrjar 1. apríl, men er ikki endaliga løgd enn.

23.02.07
Vit kenna øll Klaksvíkskappingina, steypakappingin har tey luttakandi liðini eru trý tey fremstu liðini í Formuladeildini umframt KÍ, sum í februar mánaði kappast um Klaksvíkssteypið.
Leygardagin 17 mars fáa kvinnurnar møguleikan at kappast í líknandi kapping. Talan er um kappingina um kvinnusteypið, har tað eru bestu kvinnuliðini undanfarna kappingarár, sum fáa høvið at vísa sínar dygdir undan landskappingarbyrjan.
Sum fyriskipari verður B36 eitt av liðunum í kappingini, meðan hini liðini verða KÍ, GÍ og EB/Streymur.
Málið er, at tað skal vera ein árligt afturvendandi kapping, sum umframt at geva leikarunum og liðunum ein góðan møguleika at vísa hvat er í væntu frá teimum hetta árið, eisini skal vera eitt positivt íkast til føroyskan kvinnufótbólt. At talen er um eina óalmenna kapping, kann hava við sær, at venjarnir fara at vera meira kreativir og geva leikarunum fríari teymar, og hetta skuldi so eisini verið við til, at tað fyri áskoðarnar verður talan um 4 góðar kvinnudystir.

Skráin fyri dagin er henda:
Kl. 10.00
Niðari vøllur: Lið A – Lið B
Ovari vøllur: Lið C – Lið D
*Luttakast verður um, hvat lið skal vera Lið A o.s.fr.

Kl. 13.00
Døgurið í B36-húsinum fyri leikarar og liðleiðarar.

kl. 15.00
Ovari vøllur: B36-AB, løggmannssteypið.

Kl. 18.00
Niðari vøllur: dystur um 3. og 4. pláss
Ovari vøllur: Finala

kl. 21.00
Okkurt verður lætt til matnað í B36 húsinum afturvið formellum og óformellum práti um kvinnufótbólt, lands og steypakappingarnar sum standa fyri framman.
Steyp verður handað vinnandi liðnum.

Kl. 22.00
Kappingin um Kvinnusteypið 2007 endar.

AB, sum gjørdist nr. 3 í fjør hevur givið avboð og tí er EB/Streymur sum gjørdist nr. 4 í fjør komið í teirra stað.

13.02.07
Langt um leingið so hava KÍ-kvinnurnar fingið nýggjan venjara. Eftir at Jón Harald fór til EB/Str., var greitt at nýggjur venjari skuldi finnast til KÍ-kvinnurnar. Hetta hevur tikið sína tíð, men nú er so alt komi uppá pláss. Nýggi venjari eitur Alexander Djordjevic, og er hann ikki ókendur í KÍ.


Hann kom til Føroyar sum leikari, og hevur tey seinnu árini virka sum venjari. Hann hevur eisini verið hjálparvenjari hjá KÍ-kvinnunum, serliga til Uefa-cup kappingarnar.
KÍ-kvinnurnar eru so nú farnar at fyrireika seg til komandi kappingarár, og er málið enn sum áður, at vinna allar dystirnar, og enda við greipuni. Men eisini er málið at fáa betur úrslit í Uefa-cup, og kanska at koma víðari til annað umfar.
Venjingin er farin í gongd, og eru allar gentir/kvinnur hjartaliga vælkomnar.

07.01.07
KÍ-kvinnurnar fáa nýggjan venjara í ár. Jón Harald Poulsen, sum hevur verið venjari øll gullárini hjá KÍ-kvinnunum, og langt áðrenn tað eisini, verður ikki venjari hjá KÍ-kvinnunum komandi kappingarár. Jón Harald hevur valt, at fara til Eiðis at venja kvinnurnar hjá EB/Streymi. Jón Harald heldur, at tað er bæði sunt fyri hann og fyri kvinnurnar hjá KÍ, at royna okkurt nýtt, og tískil hevur hann, valt at taka av avbjóðingini hjá EB/Streymi.

Her er Jón Harald valdur til Ársins KÍ-ara á 100 ára gallaveitsluni í 2004

Jón Harald verður heilt sikkurt saknaður í KÍ, og tað verður ikki fyrr enn nú, at ein fer at síggja hvussu nógv, hann hevur gjørt fyri felagið, og serliga KÍ-kvinnurnar. Tað er ikki ov nógv sagt, at hann er orsøkin til, at KÍ-kvinnurnar eru har, tær eru í dag. Tað var hann sum byrjaði við, at KÍ-kvinnurnar skuldu vera líka ella betur stillaðar enn mennirnar, viðvíkjandi venjingarklæðum og at tey hava verið rein til hvørja venjing.
Tað var eisini hann, sum legði trýst á nevndina, so at teir meldaðu KÍ-kvinnurnar til Uefa-cup í 2001 tá hendan kapping byrjaði. Og í dag er KÍ nærum einasta felag, sum hevur luttikið í hesi kapping á hvørjum ári síðani.
Hesar kappingar hava kosta nógvan pening og nógv pappírarbeiðið, og alt hetta hevur Jón Harald tikið sær av, og hóast hetta hevur gingið yvir venjingarnar, so hevur tað ikki bila, tí við Jón Harald sum venjara, eru KÍ-kvinnurnar mest vinnandi felagið í landinum, og hava metið fyri mest vinnandi meistaraheitir á rað. Hetta ger hann til suverent mest vinnandi venjara í landinum.
KÍ-kvinnurnar vilja takkað Jón Harald fyri gott samstarv, og ynskja honum alt tað besta við venjarastarvinum á Eiði. Tú verður heilt sikkurt saknaður.

Hvønn nýggjan venjara KÍ-kvinnurnar fáa, er ikki greitt enn, men tað verður spennandi at síggja, hvør torir at takað yvir eftir Jón Harald.

Tíðindi 2006