Tættir úr vinnulívinum:

Klaksvíkingurin í Kista - í tøkiniliga meningarmiðdeplinum



Svenski býurin Kista hevur megnað at sett seg á heimskortið, tá talan er um tøkniliga menning. Býurin ið liggur beint uttan fyri Stokhólm, hevur undir 30.000 íbúgvar, men hevur eitt fjølbroytt útboð av hølum og í sambandi við at byggiverk-ætlanir sum frálíður verða framdar í verki, økist útboðið av nýggjum hølum við fleksiblum verkætlanum. – Tvinnar av størru byggiverkætlanunum eru "Kista Science Tower" og "Kista Entré".

Ofta verður havt á munni, at "menniskjan fylgir illa menningini av kunningartøknini, tí hon mennir seg sjálva, skjótari enn menniskjan er før fyri at hugsa".
Thomas Watson stjóri og íbirtari av IBM segði í 1948, at "tað verður ongantíð rúm fyri meiri enn tveimum teldum í heiminum". – Í 1968 – 20 ár eftir – segði stjóri á framkomnari teldufyritøku, at "tað fer ongantíð at bera til, at ein telda fer at standa í hvørjum heimi".
Menningin er dygg, vitskapurin økist í stórum skjótari og skjótari, og menniskjan leitar eftir nýggjum leiðum hvønn tíma og hvønn minutt innan kunningartøknina.

Føroyingar eisini hjá Microsoft
Í hesi menning eru føroyingar við, hóast smáir, so eru eisini føroyingar, sum hava gjørt um seg í útlondum.
Ein teirra er Rúni Hansen úr Klaksvík, sum hevur starvast hjá Microsoft, og í dag starvast hjá altjóða fyritøkuni Basset, ið er heimahoyrandi í Svøríki.

Mamman sá lýsingina
Í september mánaði 1995 stóð lýsing í einum dagblaðið eftir fólki. Lýsingin var frá Microsoft, fyritøkuni hjá Bill Gates.
Rúni vísti ikki hesi lýsing serligan ans, meðan mamma hansara helt, at hetta var nakað fyri Rúna, og gjørdi ikki mætari, enn at hon sendi umsókn inn.
Stutt eftir varð Rúni biðin um at møta úti í Brøndby hjá kendu "headhuntara- og lýsingafyritøkuni" Mercuri Urval. – Hann fekk starvið.
Áðrenn hevði hann í 1980unum arbeitt hjá p/f Data í Havnini. Í 1988 tók hann FHX í Danmark. fyri at vinna sær lønandi arbeiði, málaði hann um sumrarnar. Í 1989/93 gekk hann á Sønderborg Handilsskúla, fekk útbúgving sum "edb-assistent-ur/datamatikari". Í 1993 tók hann tvey skeið í "datanom objektorienterað analyse, design og program". – Hetta vóru tvinni modul í 6 mánaðar, ið góvu prógv.

Frá ICL til Basset
Í august 1996 flutti Rúni í annað starv hjá hátøkniligu fyritøkuni ICL. Hetta er fyritøka sum Fujitsu og Siemens eiga. – Her gjørdist Rúni serviceteknikari, síðani system-administratørur, har hann hevði fulla ábyrgd av 50NT servarum, bakkup og umleið 2000 brúkarum.
ICL selur loysnir, hardware og software til kommunu- og sjúkrahússkipanir og leverar heimateldur til eitt nú stóra flogfelagið SAS, og hevur ábyrgd og tænastu av hesum.

Kista – eitt Silicon Walley
So gott sum allar hátøkniligu fyritøkurnar hava skandinavisku høvuðsskrivstovuna í Kista, so sum ICL, Oracle, Fujitsu, Dell, IBM, Ericson og mangar aðrar. – Hetta er eitt Silicon Walley Í Skandinaviu. – Kista er soleiðis miðdepil fyri allari tøkniligari menning.
Í "Kista Science City" verða í løtuni stórar framtíðarætlanir lagdar, so stórar, at teir ætla at gerast fremstir í øllum heiminum, har fróðskaparsetrið (univeristetið), bústaðir, mentan, náttúran, tænastur og heimsins fremstu fyritøkur samvirka og draga at sær øll tey dugnaligastu fólkini.

Virka í heimshøpi
Altjóðagerðin kemur alt skjótari inn á okkum, og tann ið ikki fylgir henni, hevur ongan møguleika. – Her ræður um ikki at ganga í fótasporum hjá øðrum, men at sleppa sær fram um.
Í 2000 byrjaði Rúni síðani hjá Basset, har hann framvegis er í starvi.
Basset varð sett á stovn í 1997, hevur høvuðssæti í Svøríki. Umframt tað hava teir deildir í Malaysia og í USA. Rúni varð settur í arbeiði sum nr. 17. Basset hevur umleið 100 fólk í vinnu og hevur umleið 100 "installatiónir" í 60 ymiskum londum.
Felagsins virki innan samskifti fevnir serliga um brotsmannaøki, t.d. stolnar telefonir, har tilber at seta ávaringartól á - so ein beinanvegin veit, hvaðandi brotsmaðurin ringir frá - faktureringsskapanir, roaming, soleiðis at ein lættliga kann ringja í øðrum londum, týðingar av telefonfílum til lesifør data v.m.
Í mongum førum leggur Basset seg eftir lyklaklárum skipanum.

KT-krøvini økjast í stórum
Teir siga sjálvir orsøkina vera, til at teir hava havt ein so góðan vøkstur, at teir eru "skjótir at menna", "skjótir at installera" og síðani hava teir "vælskipaðar avtalur við samstarvspartar".
Umframt hetta sigst vera sera umráðandi "kappingarførir prísir", "skjóttvirkandi software", sum eru løtt og einfald at nýta og "software sum alt tænastufólkið kann nýta".
Basset gevur starvsfólkinum skeið í menning og í framtíðarútlitum. Hesi skeið kosta nógvan pening, men eru neyðug og gevandi. Fyritøkurnar mugu vera fíggjarliga væl fyri. Skeið verða hildin í fjarløgdum londum. Hetta verður gjørt bæði fyri at koma úr dagliga umhvørvinum og eisini fyri at kenna marknað og mentan langt burturi frá okkum
Heimurin er vorðin so lítil, føroyingar finnast á øllum mótum, og teir gera seg sanniliga eisini galdandi, har teir eru.
Her heima verður eisini virkað dagliga fyri menning. Talan er um gransking, men eitt er givið, og er sera umráðandi, at føroyingar fáa dygt samband við fyritøkur, sum eru komnar longri enn vit.
Rúni sigur eisini, at eitt av stóru vakstrarøkjunum hjá Basset er í Baltisku londunum, eitt nú arbeiða teir fyri almennu fyrisitingina í Letlandi.
Tað er hugaligt at síggja føroyingar væl fyrikomnar í útlondum. Hetta eru góð umboð fyri Føroyar. Vit eiga eisini at royna at gera okkum til góðar av teirra royndum og teirra vitan.
Men - sjálvandi er eisini hesin klassiski spurningurin settur Rúna, um hann vendir heimaftur
Her svarar hesin sáttligi, hóvligi og hugsunarsami klaksvíkingurin: "Í løtuni vil eg vera har sum eg eri, mitt í kunningartøkniliga hjartanum".

Grein í Norðlýsinum juli 2002