Hans Frederik Djonesen F.26.10.1855. D.27.7.1935, 79 ár, ættaður úr húsinum Hjá Djóna og varð tí róptur Djóna-Hans Fredrik. Hann sigldi við slupp sum ungur og var nógv við skipunum hjá Godtfred Heinesen, m.a í 1894 sum kokkur við "Gauntlet". Í 1904 var hann kokkur við "Prøven" til útróður undir Íslandi. Kokkalønin var 35 kr. um mánaðin. Um vetrarnar fekst hann eisini við ymiskt annað, og vóru brøðurnir "hjá Djóna" m.a. sagdir at vera so óførir grótmenn. Í fólkateljingini 1890 er hann skrivaður "handelsmand", men tað er hann ikki leingi, tí seinni verður hann aftur skrivaður "fisker". Brøðurnir "hjá Djóna" eru eisini sagdir at  vera millum teirra, ið løgdu støði undir motorbátatíðina í Sørvági, sum byrjaði um aldaskiftið 1900, og sum stóð í hægsta blóma undir fyrra heimsbardaga. Djóna-Hans Fredrik og bróðirin Djóna-Tummas keyptu í 1903 motorbátin "Prøven", VA. 81, sum Elias í Rættará í Havn bygdi. Hann var 21,18 br. tons til støddar, spískur aftan og hevði eina mastur. Hann fekk motor ísettan í 1906. Annars áttu eisini Olaf Finsen, apotekari í Havn (hann var reiðari), Óli á Bø og Leyningurin í hesum bátinum. Hann varð seldur á tvingsilsølu í 1910, og keypti Olaf Finsen hann tá.
    Djóna-Hans Fredrik var tvær ferðir giftur. Fyrru ferð giftist hann tann 15.11.1881 í Sørvágs kirkju við Sofie Jacobsen F.3.8.1856. D.12.8.1890, 34 ár. Smb. kirkjubókini.: "Død af halssygdom". Hon var ættað úr Sjúrðhúsi í Miðvági, dóttir Jacob Joensen og Annu Elisabeth Olesdatter. Sofía stóð smb. kirkjubókini at tæna hjá Frederik Heinesen í Miðvági, tá ið tey giftust. Hon var hálvsystir Petrinu, konu Dunga-Jóannes.
    Djóna-Hans Fredrik bygdi uppi í Lágabø. Stutt eftir, at hann hevði bygt, bygdi hann handil upp í húsini oman fyri og handlaði har eina tíð. Í fólkateljingini 1890 stendur hann skrivaður "handelsmand", men hesum gavst hann við aftur og leigaði so handilsbygningin út til Hans Nikláa Niclasen, keypmann í Miðvági. Billu-Kristjan handlaði har fyri Hans Nikláa frá ár 1900 og í nøkur ár. Tá ið Billu-Kristjan var givin at handla har, varð húsið gjørt um til íbúð, og kom so ein dóttir Djóna-Hans Fredrik at búgva í teimum. Hon var g.v. Leyna-Martini, róptur, og var tað ovari partur, sum var íbúð fyri seg sjálvan, rópt: Hjá Leyna-Martini. Niðari partur, sum Djóna-Hans Fredrik búði í, var ein lítil íbúð. Í henni var roykstova, eitt kamar og ein lítil stova, sum tey búleikaðust í við fleiri børnum; so har var trongligt.

 Húsfólkni hjá Djóna-Hans Fredriki fólkateljingina 1890 eru:
 Et Hus.
 Hans Fredrik Djonesen    35     Handelsmand
 Sofia f.Jacobsen              34     Hans kone, Midvaag
 Anna Sofie Hansen            7     Datter
 Sunneva Hansen                5        "
 Adolf Hansen                    2     Søn
 Hedvig Joensen               28     Ugift, Tjenestepige, Midvaag
 Anna Marie Johannesen   85    Enke, Saxen, Anbragt under fattigforsørgelse
 Elsebeth Hansen              24    Logerende, Thorshavn

Sofía doyði í 1890, stutt eftir hesa fólkateljing. Hendan Anna Maria, sum er hjá teimum, var einkja eftir Jóannes á Mýruni. Í fólkateljingini 1880 var hon í Klubbanum. Hon doyði helst út frá teimum hjá Djóna-Hans Fredriki.
    Eftir at Sofía var deyð, giftist Djóna-Hans Fredrik uppaftur í 1891 við Hedvig, ið her er tænastugenta hjá teimum.
    Djóna-Hans Fredrik giftist seinnu ferðina tann 25.10.1891 í Sørvágs kirkju við Hedevig Frederikke Joensen, Hedvig, F.15.10.1861. D.18.4.1934, 72 ár, ættað úr Miðvági, dóttir Jóan Hendrik Joensen og konu Susanne Cathrine Heinesdatter. Hedvig kom til Sørvágs í 1886, smb. fólkateljingina í 1901 sum tænastugenta hjá Djóna-Hans Fredriki og Sofíu og var hjá teimum við fólkateljingina 1890, sum sæst. Annars kann leggjast afturat um Djóna-Hans Fredrik, at hann var helst fyrsti fiskavrakarin í Sørvági. Hann doyði í 1935 sum gamal maður.