Heine Johnsen F.29.9.1824. D.u.1850. Um Heina í Nýggjustovu verður søgd henda áhugaverda søga: Heini var fyrsti sørvingur vit vita um, sum fór út at sigla. Hann fekk fyrstu ferð ferðarloyvi frá fútanum tann 16.8.1842, har sagt verður, at hann er miðal av vøkstri, ljóshærdur og hevur blá eygu. Hann er einaferð komin heimaftur og fær nýtt ferðarloyvi tann 11.11.1844. Hann sigldi við donskum eysturindiufara, tók seinni stýrimansprógv í Keypmannahavn og var fyrsti vágamaður við tí lærdómi.
    Annars sigur søgan um hann soljóðandi: Heini fór eftir hetta aftur út at sigla við eysturindiufara, við lyfti um at verða 1. stýrimaður á skipinum, tá ið teir komu aftur til Danmarkar. Men tá ið skipið kom í Skagerak, hvarv Heini av skipinum í besta veðri á nátartíð. Hildið varð, at hann var fyribeindur. Óvist er, hvat ár hetta hendi, tað man hava verið um 1850 ella har um, so Heini doyði sera ungur. Tað sigst, at vinmaður Heina, Tummas Effersøe, fylgdi honum umborð síðsta túrin og bar skipskistuna hjá honum.
    Henda kistan kom seinni heimaftur, og í henni var m.a. bíbil hansara, sum familjan hevur havt í varðveitslu síðani, og er hon í dag á Sørvágs Bygdarsavnið í varðveitslu.