Jens Sigmund Haraldsen, Sigmund, F.6.9.1847. D.7.2.1933, 85 ár. Hann er ættaður úr húsinum Oman fyri Lon í Sandavági, sonur Harald Thomasen og konu Margrethe Susanne Olesdatter. Tá ið Sigmund giftist, var mamman einkja smb. kirkjubókini. Sigmund giftist tann 26.9.1875 í S.K. við Cathrine Marie Jacobsen F.17.8.1847. D.20.6.1924, 76 ár, ættað Uppi úr Lofti í Sørvági. Í fólkateljingini.1870 er hon í Sandavági og tænir, og stendur hon at vera hjá kongsbóndanum Ole Jacob Olsen. Hon er tá 22 ár, ógift, tænastugenta. Hon var helst fleiri ár í Sandavági. Hon varð við barn har í 1875, enn ógift, og stendur Sigmund sum faðir. Stutt eftir, at hon hevði átt, giftust hon og Sigmund í Sørvágs kirkju og búsettust her.
    Ein frásøgnin er eftir ein eldri sumbing, ið er ættaður úr Lágabø í Sørvági. Sigmund í Lágabø hevði einaferð eina tænastugentu, og einaferð bar tað so á, at hann hevði akkurát verið og skotið og var komin til hús og hevði sett byrsuna lødda frá sær í køkinum. Byrsan var helst ein forladari. Hon stóð í einum króki í køkinum. Tænastugentan sat og bant. Nú einaferð kemur noðað inn undir byrsuna, uttan at hon leggur tað til merkis. Tað stendur so á at fáa tráð, og hon togar til, men hvat hendir, byrsan fer um koll og brestur í gólvið, og skotið gongur av beint ímóti henni. Tá húsfólkini koma inn, finna tey tænastugentuna liggjandi deyða í einum hyli av blóði. Tá hevði skotið rakt hana so meint, at hon doyði av tí.
    Sigmundur í Lágabø, sum hann varð nevndur, var útróðrarmaður, og var tað hansara høvuðsvinna. Hann tókst eisini eitt sindur við jarðarbrúk og annars alt vanligt arbeiði, ið var tá í tíðini.